Los alumnos del Proyecto JuglarEx Guardianes de la Cultura, con la ayuda de Oscec (Órgano de Seguimiento y Coordinación del Extremeño y su Cultura) reivindican
el ‘estremeñu’ como lengua y referente cultural.en la recuperación del
Patrimonio.
MAIRINA (MADRECITA)
de Pablu Gonçalvi Gonçali, Calçaílla.
Quíu estal de ti enverina
comu quandu chipileti,
i ofrezel-ti el ramilleti
de mis querelis, mairina.
Me recuerdu quandu chicu,
harta mondongu venías,
sempri besus me trayías
ena frol de tus hozicus.
Dispuesinu, t’asseavas.
Mentris que la cena hazías,
los suoris d’aquel día
ena lumbri me contavas.
Dispués, cayíu el beranu,
pardagueandu, ena puerta,
la tu alma, pa mí abierta,
me palrava nel seranu.
Yo ena halda, acibarrau,
oyía las tus palracionis,
i un mundu figuracionis
me queava encandilau.
Tola mi vía está enllena
de ti i tolas tus oras.
Mi coraçón atesora
toitu lo tuyu con pena.
Con pena de que te huisti
sin sabel yo que te ías,
mentris tu mesma escondías
la pena que me truxisti.
Ara que estás lexoti,
quiciás que en anguna estrella,
mairina, mía-mi dendi ella
comu hazías uguañoti.
I enverina, mu enverina
estarás, pol mé essa estrella,
tú de mí, i yo, pol mé d’ella,
tamién te veré, mairina.
No hay comentarios:
Publicar un comentario